LA UNION – Saan a nailemmeng ni La Union 2nd District Representative Sandra Eriguel iti sakit ti nakem na ken panang-pabasol iti sumagmamano nga opisyal ti pulisya seknan iti pannakatay ti asawa na a ni sigud a Congressman Eufranio Eriguel.
Iti privilage speech na idiay Karama de Representante, kinuna ti mammanday linteg a sumagmamano nga aldaw sakbay iti napasamak a krimen ket saggaysa a naikkat iti police security detail daytoy iti laksid ti apela ni sigud a Congressman Eriguel iti sigud a La Union police provincial director a ni S/Sr. Genaro Sapiera gaputi pangta iti biag dagitoy.
Ngem maipagarop a kinedkedan ni Sapiera iti kadawatan dagitoy gaputi pammailin iti agdama a regional director ti Police Regional Office-1 a ni C/Supt. Romulo Sapitula nga i-pullout dagiti security details.
Segun pay kenni Rep. Sandra, sakbay iti miting de avanci idiay Barangay Capas, iti lugar a nakapapatayan iti asawa na ket nagsurat pay iti barangay kapitan sadiay tapno kumiddaw ti police assisstance iti sigud a hepe ti Agoo Police Station a ni C/Ins. Alfredo Padilla Jr., ngem saan a nagresponde ti opisyal.
Impaganetget ti mammanday linteg a mamati daytoy a sibibiag koma pay iti asawa na ken naliklikan a mapasamak iti pammaltog, nu saan a gapu iti maipagarop a pammilin ti police regional director ken iti saan a panangsungbat iti naikkat a chief of police iti kadawatan ti barangay official.
Kabayatanna, naminsan pay a kiniddaw ti kongresista kadagiti pada na a mammanday linteg nga imbestigaran iti nagbalin a gunay ti pulisya seknan iti pannakatay iti asawa na agsipudta kaiyarigan daytoy kunana iti panang-atakar iti institusyon ken kadagiti umili.
