BR LA UNION – Maipagarop a pinaltugan ti riding-in-tandem iti maysa a lalaki bayat a magmagna iti barangay road idiay Barangay Cabuaan Oeste, Balaoan, La Union agarop alas 10:30 ti rabii idi Sabado, Pebrero 22.
Iti biktima ket nabigbig iti nagan a Willy Nerona, 47-anyos, construction worker, residente ti Barangay Cantoria 1, Luna La Union.
Maibasar iti inisyal nga imbestigasyon dagiti otoridad idiay Balaoan, sakbay ti insidente ket magmagna ti biktima iti nasao a kalsada, nga agawiden ken naggapo iti pallutan.
Kellaat a timpuar iti maipagarop a riding-in-tandem, a nangpaltog kenkuana ti mamin-lima a daras.
Kimmiddaw ti tulong ti biktima iti limmabas a motorsiklo, minaneho ti managan Jeff Lopez-Purugganan, adda iti umno nga edad, ken residente ti nasao met laeng a lugar.
Iti panagresponde dagiti otoridad kadwa da ti MDRRMO, inturong da ti biktima iti kaasetgan a pagagasan, idiay Balaoan District Hospital.
Narekobre iti nakapasamakan ti insidente ti dua nga slug ken 3 a fire cartdrige case ti cal. 45
Kabayatanna, dagus a nangipatungpal dagiti otoridad ti dragnet ken hot pursuit operations, para iti pannakatiliw dagiti suspek a naglibas kalpasan ti insidente.
Agtultuloy ti imbestigasyon ti pulisiya tapno duktalen ti kinasiasino dagiti suspek ken motibo ti napasamak a pammaltog.
