BR LA UNION – Arestado ti maysa a lalaki a naireklamo ti grave scandal gapu iti maipagarop a panangiggem ken panangipakita ti mabagbagi na iti uneg ti maysa a provincial bus nga agturong idiay Baguio City.
Ti suspek ket nabigbig nga agtawen ti 35, driver, ken residente ti Barangay Agdao, Malasiqui, Pangasinan.
Ti biktima ket 22-anyos a babai, addaan asawa, maysa a 4th year college student ti Tourism Management iti maysa nga unibersidad idiay siyudad ti Baguio, ken residente ti Barangay Moreno, Binalonan, Pangasinan.
Maibasar iti report ti Pugo Municipal Police Station, agka-abay iti tugawan iti uneg ti bus ti biktima ken suspek.
Kabayatan ti biyahe ti bus nga agturong idiay Baguio City, nakaturog ti biktima ngem nakigtot laengen idi makariing agsipudta maipagarop nga ipak-pakita metten ti suspek ti mabagbagi na.
Napasamak daytoy idi nag-stop over ti bus iti maysa a panganan idiay Barangay Duplas, Pugo, La Union, bigat ti Nobyembre 3, 2025.
Kas resulta, nakigtot ken nagbuteng ti biktima, dagus nga impaka-ammo na iti bus conductor kalpasanna, naireport kadagiti otoridad.
Dagus a nagresponde dagiti otoridad ket inarestar da iti suspek, naiturong iti Rural Health Unit idiay ili ti Pugo para iti medical examination ken naipasidong iti kustodiya ti Pugo MPS para iti umno a dokumentasyon ken disposisyon.
