BR LA UNION – Naideklara a dead-on-arrival iti maysa a pribado nga ospital ditoy siyudad ti San Fernando, ti maysa a nataengan a maipagarop a napukawan ti puot bayat a nakatugaw iti bleacher iti uneg ti pallutan ditoy siyudad ti San Fernando.
Maibasar iti police report, ti biktima ket nabigbig iti nagan a Rafael Piano, agtawen ti 68, awanan asawa, residente ti Barangay Mameltac ditoy siyudad.
Iti inisyal nga imbestigasyon dagiti otoridad, nakita ti managan Christian Flores, 39-anyos, residente ti Barangay Cabaroan, ken dagiti dadduma pay a tattao nga adda iti uneg ti cockpit arena, iti biktima a nakatugaw idi kellaat a natumba gaputi pannakapukaw ti puot na.
Dagus a naiturong ti nataengan iti ospital ngem indeklara a dead on arrival ti attending physician a ni Dr. Carol Lomboy.
Kinumpirma ti doktor, a cardiopulmonary failure iti nakatayan ni Piano.
