BR LA UNION – Natay ti maysa a tricycle driver gaputi pannakalmes kabayatan ti panagkalap na ken nasarakan a tumtumpaw iti kabaybayan idiay Brgy. Pagudpud ditoy siyudad ti San Fernando.
Ti biktima ket nailinged iti nagan a Mandy, agtawen ti 54, addaan asawa, residente ti Brgy. Bancagan, Naguilian, La Union.
Maibasar iti imbestigasyon ti pulisiya, ti biktima ket napan nagkalap idi Disyembre 19, agarop alas 3:00 ti malem, ngem saanen nakaawid ti karabyanna.
Kinabigatanna, Disyembre 20, agarop 6:00 ti bigat, maysa a mangalap ti nakakita ti bagi ti biktima a tumtumpaw asideg ti styrofoam raft na.
Dagus nga indanon ti mangalap a nakakita kadagiti otoridad.
Nagresponde met a dagus dagiti personnel ti City of San Fernando Police Station (PS), kabinnulig ti Philippine Coast Guard (PCG), iti nasao nga insidente.
Kalpasanna, naiturong ti biktima iti City Health Office ket sadiay a naideklara a dead on arrivial babaen ti attending physician a ni Dr. Pauline Rivera, Health Officer ti City Health and Wellness Center, City of San Fernando, La Union.
Naiyanunsiyo a natay ti driver gaputi “asphyxia secondary to drowning”.
