BR LA UNION – Arestado ti maysa a lalaki a nagbalin a pugante iti uneg ti 23 a tawen.
Babaen iti bileg ti Warrant of Arrest nga impaulog ti Presiding Judge iti Regional Trial Court, Branch 29, First Judicial Region, San Fernando City, La Union, a napetsaan ti February 21, 2002, naiserbi daytoy babaen iti operasyon nga inganwat dagiti operatiba ti City of San Fernando Police Station (lead unit), Regional Intelligence Division 1 (RID 1), La Union Maritime Police Station (LUMARPSTA), ken Tactical Support Company – Regional Mobile Force Battalion 1 (TSC-RMFB 1), idiay Barangay Tanqui ditoy siyudad agarop alas 9:00 ti bigat idi June 16, 2025.
Nagresulta daytoy iti pannaka-arestar ti suspek nga agtawen ti 46, driver, addaan asawa, ken residente ti Brgy. Acao, Bauang, La Union.
Iti suspek ket sumangsango iti kaso a panaglabsing iti Section 8, Article II iti Republic Act 6425 (Dangerous Drugs Act of 1972) nga itan ket naamendaran.
Inrekomenda ti korte iti piyansa nga umabot ti Php 60,000.00 para iti temporaryo a pannakawaya-waya ti suspek.
Nai-record ti operasyon babaen iti PNP-issued Body-Worn Camera maiyannurot iti transparency and accountability protocols.
Kasaruno iti pannaka-arestar ti suspek, naiturong iti City Health Office para iti medical examination, kalpasanna, naipasidong iti kustodiya ti City of San Fernando Police Station para iti umno a disposisyon.
