LA UNION – Dead on arrival idiay ospital ti maysa a lalaki a natinnag manipud iti tuktok ti pampasahero a jeep idiay Barangay Mangaan, ili ti Santol, La Union.
Nabigbig ti 57-anyos a biktima a ni Roy Bag-oyen, residente iti probinsya ti Apayao.
Naammuan ti Bombo Radyo manipud iti Santol Police Station, kaddua ti biktima iti sumagmamano a kakabagyan daytoy a nagpwesto iti bubongan ti jeep a dumar-ay koma iti family reunion.
Kabayatan a sumangsang-at ti nasao a lugan idiay bantay ket simmagid ti biktima iti maysa a kable kasaruno iti pannakatinnag daytoy iti kalsada ken naipakpak ti ulona.
Iti agdama, adda ti maysa a punerarya ti bangkay ti biktima ken iyawid daytoy iti kakabagyanna ti bukodda a lugar.
