Naidatagan ti agtutuon a kaso iti maysa a lalaki a nagprobokar idiay Barangay San Benito Sur, Aringay, La Union.
Iti suspek ket nabigbig ti nagan a Freddie Medina, agtawen ti 44, baro, residente ti nasao a lugar.
Maibasar iti report ti Aringay PNP, iti suspek ket armado ti buneng idi maipagarop a sinaed na ti managan Francisco Medina Flora, 42-anyos, bayat a nakalugan iti traysikel na, kadwa na ti asawa ken anak da nga agtawen ti maysa.
Ngem nakataray ni Medina idinto a nabati iti traysikel ti ag-inana.
Gaputi insidente, nagresponde ni Brgy. Kagawad Leo Maglaya, 53-anyos, ngem kinamat met laeng isuna ti suspek iti buneng.
Simmaruno a nagprobokar ti suspek iti compound da Daisy Cresta Dulatre, 38-anyos, ti nasao met laeng a lugar. Simrek ti suspek iti pagtaengan da Daisy ket ginandat na a tagbaten daytoy.
Ngem nagasat a nakataray ni Daisy kadwa na ti anakna nga agtawen ti uppat.
Nagresponde met dagiti kameng ti Aringay Police apaman a naireport kadakuada ti insidente, ngem uray dagitoy ket nakangngeg ti saan a nasayaat a sarita manipud iti suspek.
Iti pannakaipasidong ti suspek iti medical examination, nakumpirma a nakainom daytoy ti nasanger.
Natiliw ti suspek ket naidatagan ti kaso a grave threat, disobedience of a person in authority, direct assault, ken alarm and scandals.
