Maysa nga Indian a ni Cecil Andre Gomes ti saan a makaegna gapu iti kanayon a panagdara ti agong na agingga a napanunot na ti mapan agpa-checkup iti doktor tapno maammuanna ti makagapu iti sakit na.
Nakigtot ti nangeksamen a doktor idi nakitana ti sibibiag a leech wenno linta iti uneg ti agong ni Gomes idi nagusar iti maysa nga aparato.
Segun kenni Dr. Subhash Chandra Verma, ti panagsusop ti dara ti leech ti makagapu no apay a di agsarday ti panagpadara ti agong ni Gomes.
Mabalin a simrek ti leech iti agongna idi nagdigos isuna iti karayan. Kinuna ti doktor a pagimbaganna ta saan a nakadanon ti leech kadagiti kritikal a paset ti ulo ni Gomes kas kadagiti mata wenno utek – nupay manmano a mapasamak kasta.
Naikkat ti sibibiag a leech ken awan ti nadadael iti uneg ti agong ni Gomes.
Iti leech ket mabalin nga agbiag iti sumagmamano a lawas iti uneg ti bagi ti tao ken gagangay a sumrek iti bagi ti tao manipud iti pamilia a Praobdellidae a mangmangan kadagiti mucous membranes.
