BR LA UNION – Maibilang a ballaygi ti Integrated Bar of the Philippines (IBP) – La Union Chapter iti insayangkat da a nalawa a Legal Aid Activity idi Setyembre 17, 2026 idiay Speaker Pro-Tempore Francisco I. Ortega Convention Center, Brgy. Sevilla, City of San Fernando, La Union.
Ti nasao nga inisyatibo, nga addaan ti tema a “Community with a Purpose,” ket addaan tarigagay a maiyasideg iti hustisya ken serbisyo legal kadagiti ordinaryo nga umili ken opisyal ti barangay iti intero a probinsiya.
Segun kenni Atty. Myra Diwata A. Rivera, ti nasao nga aktibidad ket panangipaay ti libre a serbisyo legal kadagiti kuwalipikado a benepisyaryo,
nangruna ita a bulan ti Setyembre, a masel-selebraran ti Law Month.
Kinuna na a paset daytoy ti partnership ti IBP La Union Chapter ken Provincial Government of La Union tapno maidanon iti libre a legal assistance kadagiti agkasapolan iti naduma-duma nga ili ti probinsiya.
Kabilang dagiti kangrunaan nga isyu legal nga ikam-kamang kadakuada dagiti benepisyaryo ket isyu maipapan iti sanikua, land disputes, ken pannakabingay dagiti tawid wenno sanikua ti pamilya.
Sumagmamano met ti umas-asideg para kadagiti kaso nga adda pakainaigan na iti Violence Against Women and their Children wenno VAWC, a maiyas-asideg iti IBP para iti maiparbeng a legal nga addang ken posible a panangidatag ti reklamo.
Para kadagiti saan a nakadar-ay iti naisayangkat a legal aid activity ngem tarigagay da a maipaayan ti libre a serbisyo legal, mabalin ti personal a panagturong iti opisina ti IBP La Union Chapter, iti 2nd Floor ti GE Antonino Building ditoy siyudad ti San Fernando, La Union.
Nupay kasta, inlawlawag ni Atty. Rivera a ti libre a serbisyo ket para laeng kadagiti kuwalipikado a benepisyaryo, maiyannurot kadagiti naipaulog nga allagaden para iti legal aid.
Kabilang iti nakatuding a legal aid activity ket maisayangkat inton Setyembre 25, 2026 idiay Barangay San Jose, Caba, La Union, ken inton Setyembre 26, 2026 idiay Barangay Cambali, Bagulin, La Union.
Malaksid iti panangipaay ti libre a legal advice, imbaga ni Rivera a silulukat ti IBP La Union Chapter a makitinnulong kadagiti barangay ken munisipyo nga agkasapolan ti legal education.
Mabalin nga agpatulod ti IBP iti volunteer lawyer a mangisayangkat ti lecture ken seminar para kadagiti opisyal ti barangay, partikular iti umno a panangipatungpal dagiti probisyon ti Barangay Justice System.
Daytoy ket tapno mapalawa ti ammo dagiti barangay officials iti proseso ti panangsolbar iti susik ti masakopanna ken makatulong iti mas naur-urnos a panangipaay ti serbisyo legal kadagiti umili.
