Binalakadan ni sigud nga Integrated Bar of the Philippines (IBP) President Atty. Domingo Cayosa ni Senador Rodante Marcoleta a subliyanan a basaen manen dagiti probisyon wenno linaun ti Anti-Plunder Law.
Kasaruno daytoy ti immunan nga imbaga ni Marcoleta a saan a rumbeng a makaswan ti plunder gaputa saan a pondo ti publiko iti inawatna a campaign donations.
Impaganetget ni Cayosa a ti depensa ni Marcoleta ket saan nga otomatiko a mang-dismiss iti plunder case nu pagibasaran iti sakup ti plunder law.
Linagip ti abogado ti immuna a panang-admitir ni Marcoleta a nakaawat ti P75 million a pondo idi nagkandidato a senador iti napalabas nga eleksiyon.
Gaputa saan a naideklara ti nadakamat a gatad iti Statement of Assets, Liabilities, and Net Worth (SALN)-na ket mabalin ngarud a maibilang nga ill-gotten wealth, agtinnag daytoy iti P50-milion a threshold nga agserbi a pangibasaran iti kaso a plunder.
Maysa pay, gaputa saan a maiklasipika ti gatad kas donasyon iti kampania kas immunan a pinasingkedan ti Commission on Elections, kasapolan a maideklara daytoy kas asset-na kas opisyal ti publiko.
Segun ken ni Cayosa, arigna nga inlemmeng ni Marcoleta iti minilyon a donasyon a naawatna iti tallo a nagsisina a gundaway, gaputa saanna nga indeklara daytoy iti SALN ken iti Statement of Contributions and Expenditures-na.
Kinunana a daytoy nga inaramid ti senador ket ad-adda a nangpakaro iti sitwasyon, gaputa manamnama a sumango iti kaso ti plunder iti masangwanan.
