Impasiguro Philippine National Police (PNP) nga itultuloy da dagiti inisyatiba ken narugian ni sigud a National Security Adviser (NSA) Eduardo Año kasaruno ti panagretiro na gapo iti problema ti salun-at.
Dinayaw ti kapulisan ti mano dekada a serbisyo publiko ken ambag ni Año iti national security.
Segun kenni PNP Chief Police General Jose Melencio Nartatez Jr., nangibati daitoy iti napateg a marka iti sektor ti seguridad a kas sigud pay a Sekretaryo ti Department of the Interior and Local Government (DILG) ken retirado nga Heneral ti Armed Forces.
Impaganetget ni Nartatez a babaen ti liderato ni Año ket napasayaat ti koordinasyon dagiti ahensya ti gobierno a nagresulta iti nataltalged ken naannayas a komunidad.
Nangipadanon ti panagyaman ti PNP kenni Año iti dedikasyonna ti panangsalaknib ti Pilipinas iti pang-uneg ken ruar a pangta ken inyunay-unay nga agbalin a pagtuladan dagiti estratehiya na ti agtultuloy nga operasyon ti pulis.
