Imbutaktak ni Batangas 1st District Congressman Leandro Leviste nga awanen iti official bidding dagiti proyekto ti Department of Public Works and Highways (DPWH), nu ketdi ket mapilpili lattan dagiti contractors a nasinged iti nakatugaw nga opisyal, kasukat dagiti kickbacks.
Maninaig iti daitoy ket inbinglay met ni District Engineer Abelardo Calalo, inhinyero a naggandat a suholan ni Leviste, dagiti nagan dagiti dadakkel a contractor kasta met dagiti nagbalin nga akem da a ti las-ud laeng ti tallo a tawen ket nangitukon da iti aganay P1-B para iti Congressman.
Innayon met ni Leviste a makitkita na a rason iti panagumay kenkuana dagiti contractors ket gapo iti agtultuloy nga inspeksyon na kadagiti flood-control projects idiay umuna a distrito ti Batangas, karamanen dagiti nagbiit a nagdadael.
Impaganetget na a nu nakaawat man ti kickback ti maysa a Congressman ket posible a saan daitoyen a bisitaen dagiti ammo nan a substandard a proyekto.
Tarigagay ti mamanday-linteg nga agibusen ti korapsyon ti uneg ti DPWH agsipud ta dakkelen iti epekto na daitoy kadagiti umili, isu’t gapuna a pinaregta na ti district engineer ken dadduma pay a sigud nga empleyado ti ahensya nga agbalin a state witness.
