2ND DISTRICT OF LA UNION – Naiyusuat ti programa a “Libreng Sakay” ita nga aldaw Abril 20 manipud Segundo Distrito ti La Union agingga idiay Ciudad ti San Fernando.
Indauluan ni Congressman Dante Sotelo Garcia iti nasao a programa nga addaan panggep a mangipaay ti libre a transportasion para kadagiti umili manipud 2nd district.
Paset daytoy iti agtultuloy a panagregget ti opisina ti kongresista a mangkissay ti gastos iti transportasion dagiti umili, nangruna dagiti mangmangged, estudiante, ken dadduma pay nga agbiahe para kadagiti nasken a pagturunganda.
Ti dua a pick-up points ket idiay Rosario Municipal Hall iti oras nga alas-6:30 ti bigat ken 7:00 am idiay Agoo Shell Station. Dagiti bus ti DSG nga addaan ti umdas a kapasidad ket manamnama a maituding a mangibiahe kadagiti pasahero a natalged ken komportable kadagiti destinasionda.
Impasigurado dagiti mangipatungpal iti programa a prioridad ti kinatalged ti tunggal pasahero. Naipadamag a naan-anay ti pannakasukimat dagiti lugan sakbay nga agbiahe, idinto a lisensiado dagiti amin a drayber ken umdas ti kapadasanda iti panagmaneho.
Naipaganetget pay a ti libre a panaglugan ket silulukat kadagiti amin nga umili iti Maikadua a Distrito, nga awan ti kasapulan a bayad wenno panagrehistro.
Nupay kasta, mabalakadan dagiti kayatda nga aglugan a nasapsapa nga agturong kadagiti naikeddeng a pick-up points ngem iti naituding nga oras tapno makatugaw a dagos iti bus.
Daytoy a programa ket maysa kadagiti social services a panggepna a pasayaaten ti public access iti transportasion ken tumulong iti inaldaw a kasapulan dagiti umili iti distrito. (Report by Bombo Ericka)
Courtesy: Congressman Dante Sotelo Garcia (FB)
