BR LA UNION – Nagpanawagan ti Malakanyang kadagiti kritiko a saan nga ipaayan ti malisya iti uppat nga aldaw a Libreng Sakay iti LRT 1, LRT 2 ken MRT 3.
Segun kenni Palace Press Officer Claire Castro, bay-an a pagnumaran dagiti umili ti tulong a mabalin nga ipaay ti gobyerno kadakuada.
Inlawlawag ni Castro nu apay a saan laeng a maysa nga aldaw iti Libreng Sakay a kas ti nakaugalian, iti rason a holiday ngamin ti May 1.
Kadagiti mangibagbaga a panawen ti eleksyon, impaganetget ti Palasyo a naiparna laeng a panawen met ti selebrasyon ti Labor Day.
Immandar ni President Ferdinand Marcos Jr. iti Libreng Sakay iti tallo a train systems manipud Abril 30 agingga May 3 kas panangbigbig iti kontribusyon dagiti mangmangged iti ekonomiya ken kagimongan.
Kabayatanna, idi kalman ket inyanunsiyo mismo ni President Ferdinand Marcos Jr. nga immandar na nga aramiden a libre ti panaglugan iti LRT ken MRT.
Nangrugi ita nga aldaw iti Libreng Sakay, Abril 30 ken agleppas inton May 3, 2025.
