BR LA UNION – Nangisayangkat ti “Kapihan sa Ilocos” idi kalman Abril 29, 2026, ti Department of Labor and Employment (DOLE) Regional Office I idiay Brgy. Biday ditoy siyudad, kas paset ti panagsagana iti pannakarambak ti Labor Day inton bigat, Mayo 1.
Adda dagiti insagana nga aktibidad ti DOLE Regional Office I ket kabinnulig da iti nadumaduma nga ahensiya ti gobierno nga addaan ti napateg nga akem iti pannakaitandudo ti pagimbagan dagiti mangmangged.
Maitampok kadagiti maisayangkat nga aktibidad para iti maika-124 a selebrasyon ti Workers’ Day, iti agsasaruno a job fair ken dadduma pay a serbisyo a direkta a pakabenipisyaran dagiti agsapsapul ti trabaho.
Segun iti ahensiya, pakabuklan nga innem (6) a job fair ti maisayangkat iti naduma-duma a probinsiya iti Rehiyon Uno.
Adda pakabuklan a 23,905 a bakante a trabaho ti naisagana para kadagiti aplikante.
Iti nasao a bilang, nasurok 18,000 dagiti lokal a trabaho, idinto a nasurok 5,000 para iti panggedan iti ballasiw-taaw.
Mapattapatta nga 188 employers ti makipaset kadagiti job fairs, ken iti agdama, 16 nga employers ti nagkumpirma a makipaset iti job fair site ditoy La Union.
Malaksid iti job fairs, mangidiaya pay ti DOLE ken partner agencies iti nadumaduma a serbisyo kas ti skills training, career guidance, legal assistance, occupational safety consultations, ken dadduma pay a programa a nairanta a mangpasayaat iti kasasaad dagiti mangmangged.
Ti tema iti nasao a selebrasyon ita a tawen, “Disenteng Trabaho para sa Lahat: Iisang Hangarin, Bagong Pilipinas Sama-samang Mararating.”
