BR LA UNION – Naiyawiden ditoy pagilian dagiti 20 a bangkay dagiti OFWs manipud Kuwait, babaen ti Kuwait Airways Flight KU417.
Kagiddan daytoy iti repatriation dagiti sibibiag a 328 nga OFWs a simmangpet iti parbangon ti Miyerkoles, April 15, 2026.
Segun iti Department of Migrant Workers (DMW) ken Overseas Workers Welfare Administration (OWWA), dagiti 20 a Filipino workers ket natay gaputi nagduduma a sagubanit ( natural causes) ken awan pakainaiganna iti mapaspasamak a riribok idiay Middle East.
Nagtinnulong dagiti ahensiya ti gobyerno tapno maipatungpal ti repatriation, laksid ti temporaryo a pannakairikep ti Kuwaiti airspace.
Daytoy ket maiyannurot iti direktiba ni President Ferdinand Marcos Jr., kadagiti nasao nga ahensiya a siguradwen nga awan ti mabati nga OFW, sibibiag man wenno natay, uray anya pay ti kasasaad wenno makagapo.
Kabayatanna, naki-simpatiya kadagiti naulila a pamilya da DMW Undersecretary Felicitas Q. Bay, Undersecretary Dominique Rubia-Tutay ken dadduma pay a mangibagbagi iti DMW ken OWWA.
Maysa a padi ken maysa a pastor iti nang-bendisyon kadagiti bangkay sakbay a naiyawid iti pamilya da.
Kiniddaw met dagiti naulila a pamilya iti pannaka-awat ti publiko nga irespeto ti privacy ti pamilya da iti panawen ti panag-leddaang dagitoy.
