Agparparang iti imbestigasyon ti National Capital Region Police Office (NCRPO) nga inggagara nga ibati dagiti suspek a nakasuot iti maskara dagiti lima a lungon kadagiti nagduduma a lugar ti Metro Manila, parbangon ti Biernes, Agosto 7.
Nasarakan dagiti lungon sadiay Santa Cruz, Manila; Barangay 54, Caloocan City; Barangay South Triangle ken Barangay Santa Teresita, Quezon City; ken Gil Puyat, Makati City.
Dua a van a nagmaris ti puraw ken gray iti inusar ti grupo. Malaksid iti lungon ket adda pay iti ruprupa dagiti opisyales ti China ken mensahe kontra Communist Party of the Philippines–New People’s Army (CPP-NPA) a nakapaskil kadagitoy.
Imbilinen ni Philippine National Police Chief General Jose Melencio Nartatez Junior iti komprehensibo nga imbestigasyon, kasta met iti pannakaiyuswat ti backtracking ken forward tracking kadagiti CCTV footages para iti nagturongan dagiti suspek.
