LA UNION – Arestado ti aglive-in partner idiay Barangay San Eugenio, Aringay, La Union kalpasan nga maiwayat ti Anti-Illegal Drug Buy-Bust operation babaen iti nagtipon a pwersa dagiti otoridad.
Maibasar iti police report, dagiti ag live in ket agtawen ti 32 ken 24, agpada a residente ti Barangay San Benito Sur, Aringay, La Union.
Naarestar dagitoy kalpasan a naglako da ti maipagarup a shabu, iti nagpammarang a buyer.
Nakumpiskar dagiti otoridad iti tallo a pidaso ti transparent plastic sachet maipagarup a shabu, mapatta-patta nga agdagsen ti 1.5 grams ken aggatad iti P10,200.
Kalpasan ti imbentaryo ket dagus a naiturong dagiti suspek idiay Aringay Police Station bayat a maisagsagana ti kaso a maidatag a panaglabsing ti RA 9165 wenno Comprehensive Dangerous Drugs Act of 2002.
