Dead on arrival iti Ilocos Training & Regional Medical Center, San Fernando City, La Union ti maysa a lolo kalpasan a madungpar ti lugan iti mismo a paraangay ti balay na iti paset ti Aringay-Tubao provincial road.
Nabigbig iti pimmusay a biktima a ni Angelo Carreon, 84, balo, ken residente ti Barangay San Simon West. iti ili nga Aringay idinto a ti respondent driver ket ni Fernan Bolaquena, 38, addaan asawa, residente ti 84 Mangga Ext. Kalawaan, Pasig, City.
Iti pannakiuman ti Bombo Radyo La Union kenni PMajor Rommel Senteno, acting chief of police ti Aringay Police Station kinuna nga agturturong iti laud a direksyon ti forward truck a minaneho ni Bolaquena idi a makadanon iti nakapasamakan ti aksidente ket napukawan iti kontrol ti manibela ti driver agingga a madungpar na ti biktima.
Gapu ti insidente ket nagsagaba iti nadumaduma a sugat iti bagi na ti biktima a nakaiturongan na iti pagagasan.
Agtaltalinaed met iti kustodiya dagiti otoridad ti respondent driver para iti naan-anay a pannakaiyuli ti kaso kontra kenkuana.
