BR LA UNION – Naan-anayen a narunaw iti Low Pressure Area (LPA) nga immuna a nasaripatpatan ti PAGASA iti laud a paset ti La Union, maibasar iti monitoring ti state weather bureau.
Iti naudi nga inruar a report ti ahensiya itay malem, June 19, narunaw ti nasao a weather system, sumagmamano nga aldaw sipud nabukel iti laud a paset ti Pangasinan.
Iti agdama, awan ti sabali nga LPA a banbantayan iti weather bureau a mabalin a mabukel kas tropical cyclone.
Nupay kasta, agtalinaed a mangigubway ti panagtudo iti sumagmamano a weather system nga agraraira iti pagilian, kas ti easterlies, intertropical convergence zone, ken localized thunderstorm, a posible a mangigubway ti kellaat a panaglayos iti sumagmamano a lugar.
Ita nga aldaw, nangiruar ti weather bureau iti General Flood Advisory iti 10 a rehiyon ditoy pagilian a pakaibilangan ti Cordillera Administrative Region, Ilocos Region, Central Luzon, Calabarzon, Mimaropa, Zamboanga Peninsula, Davao Region, Soccsksargen, Caraga, ken Bangsamoro Autonomous Region in Muslim Mindanao (BARMM).
Naabiswan dagiti local disaster risk reduction management council a bantayan iti sitwasyon iti nababa a lugar ken mangiruar ti umiso ken naipanawen nga abiso.
