BR LA UNION – Nagkampeon ti lokal gobyerno ti Luna La Union iti Rescuelympics 2026, a naisayangkat idiay Speaker Pro-Tempore Francisco I. Ortega Convention Center (FOCC), Barangay Sevilla, City of San Fernando, La Union, idi Pebrero 17, 2026.
Ti nasao nga aktibidad ket paset iti agtultuloy a pannakarambak ti maika-176 a Foundation Anniversary ti probinsiya.
Adda iti pakabuklan a 20 a bunggoy ti nakisalip manipud iti amin nga ili ditoy probinsiya.
Ti kampeon a Luna-LGU ket nangipamatmat ti kinalaing, kinapartak ken kinasagana para kadagiti senaryo a nangipakita ti kabaelan ti tunggal maysa a mangisalbar iti panawen ti didigra ken kalamidad.
Naipakita pay iti nasao nga aktibidad dagiti allagaden para iti panangiyuswat ti first aid, medical services ken rope rescue.
Segun iti La Union Police Provincial Office, iti RESCUELYMPICS 2026 ket maysa nga skills-based activity a mangrukod ken mangidur-as iti kinagsana, coordination, ken operational effectiveness dagiti ili ken siyudad iti emergency response.
Mangitandudo pay daytoy iti teamwork ken interoperability kadagiti responders ken mapapigsa iti disaster resilience iti intero a probinsiya.
