Imbilin ni Department of Finance (DOF) Secretary Ralph Recto ti madagdagos a pannakaiyuswat ti calamity assistance packages kadagiti lugar a dinayeg ti magnitude 6.9 a ginggined idiay Cebu. Karaman kadaitoy ket ti panangipaay ti cash aid, concessional loans, payment schemes, ken service subsidies.
Nakapauneg ti pammilin iti inruar na a circular para kadagiti amin a government financial institutions (GFIs) ken government-owned and controlled corporations (GOCCs) a papartaken ti panangipaay ti serbisyo iti publiko kasaruno iti saan a napakpakadaan a didigra.
Binilin na ay dagiti nasao nga institusyon ti maipanggep kadagiti claims dagiti nadadaelan ti sanikua, panangasistir kadagiti borrowers ken panangipaay kadagiti short-term loans para ti panangpapirmis kadagiti pagtaengan ken panagrekobre kadagiti pagbiagan da.
Impasiguro ni Recto nga agtultuloy dagiti financial services kadagiti bangko, ATMs, ken dadduma pay a service channels, kangrunaan na para kadagiti mannalon, mangmangged, ken estudyante.
Babaen ti Quick Response Fund (QRF) ti gobierno ken National Disaster Risk Reduction and Management Fund ket nakasaganan dagiti otoridad kadagiti relief ken recovery operations kasta met ti panangpapirmis kadagiti pasilidad, imprastruktura, ken heritage sites.
Iti biang met ti Social Security System, mangitukon da ti P10-B agingga P15-B ti Calamity Loan Program kadagiti miembro da nga apektado ti panagdayeg. Mangipaay pay ti Government Service Insurance System ti tulong pinansiyal babaen met ti calamity ken emergency loans bayat a dagiti Pag-IBIG members ket mabalin nga ag-avail ti calamity loans ken insurance claims para kadagiti mortgaged houses.
Para kadagiti minor repairs, mabalin nga ag-avail dagiti miembro ti short-term improvement loans.
