Nabigbigen ti maikadua a Pilipino a pimmusay gapo iti dimmayeg a magnitude 7.7 a ginggined idiay Myanmar idi kallabes.
Maipalagip a pinasingkedan ti Department of Foreign Affairs (DFA) ti pannakasarak ti umuna a Pilipino a pimmusay kalpasan iti sumagmamano nga aldaw a panagbirbirok dagiti rescue team.
Kinuna ti DFA nga impakaammo dan iti Philippine Embassy a nakabase idiay Yangon a nabirukan da payen ti bangkay ti maikadua a Pilipino a pimmusay a sumagmamano nga aldaw da a birbiruken.
Naipadanon payen ti ahensiya ti nagbanagan ti biktima iti pamilya na ngem kiniddaw met dagiti kakabagian nan iti panagraem ken privacy.
Saan metten a nangiruar ti DFA ti kanayunan nga impormasyon mainaig iti pimmusay kas panagraem metten iti kiddaw pamilya da.
Iti agdama ket agtultuloy latta iti panangbirok kadagiti dua pay a mapukpukaw a Pilipino.
Maipalagip a dimmayeg idi Marso-28 ti magnitude 7.7 a ginggined idiay central Myanmar a nakatayanen ti 6,640 a tattao nga agdama ket manaynayunan pay.
