Nangipila ti House Resolution dagiti mamanday-linteg ti Makabayan bloc tapno imbestigaran ti aganay 1,593 nga insidente ti anomaliya nga adda pakainaigan na ti 2025 midterm elections.
Karaman kadagiti nag-apela ti imbestigasyon babaen ti panangipila ti House Resolution 2291 ket isuda House Deputy Minority Leader France Castro, House Assistant Minority Leader Arlene Brosas, ken Kabataan party-list Representative Raoul Manuel.
Segun kadagiti mamanday-linteg, indokumento dagiti sumagmamano nga election watchdogs, karaman iti National Movement for Free Elections (Namfrel), Kontra Daya, VoteReportPH, ken Computer Professionals Union dagiti napasamak nga anomalya iti panagbobotos.
Karaman kadagiti nasao nga anomaliya ket ti aganay 800 a kaso mainaig ti automated counting machines, 200 a kaso ti ilegal a panagkampanya, 144 a kaso ti voter disenfranchisement, ken 451 a dadduma pay para ti panaglabsing ti election-code karamanen ti non-compliance iti Board of Election Inspectors, red-tagging, election-related violence, harassment, vote buying, vote selling, tampering of ballots, disinformation, ken dadduma pay.
Dinakamat pay dagiti mamanday-linteg ti kaawan ti Voter Verified Paper Audit Trail sadiay Online Voting and Counting System a naaramat ti overseas voting, posible a panaglabsing ti Section 6 (e) ti Automated Election System law, ken disqualification dagiti botante a saan a maberipikar dagiti botos da a nagresulta met ti nababa a voter’s turnout kadagiti sumagmamano nga overseas regions.
Nakalanad pay iti resolution a malaksid kadagiti technical issues ken voter disenfranchisement ket adda pay dagiti isyu sakbay, madama, ken kalpasan ti eleksiyon a nakadadael ti integridad ken kredibilidad ti resulta.
Kas sungbat ket kinuna ni Commission on Elections (Comelec) spokesperson Rex Laudiangco a nakasagana a sumango ti poll body sadiay Kongreso apaman a mapaawagan ida tapno iparang ti kinapudno.
