Impasigurado ti Malacañang nga agtalinaed iti presio dagiti kangrunaan a tagilako iti pagilian aginggana Abril 16, 2026.
Kasaruno daytoy ti naballigi a pannakikoordinar ti Department of Trade and Industry (DTI) kadagiti kangrunaan a manufacturers.
Iti press briefing sadiay Malacañang, impadamag ni Palace Press Officer Undersecretary Claire Castro a daytoy a katulagan ket paset ti Unified Package for Livelihoods, Industry, Food, and Transport (UPLIFT) program ti Marcos administration.
Segun kenni Castro, maibasar iti report ni Trade Secretary Cristina Roque kenni Presidente Ferdinand Marcos Jr., inkari dagiti manufacturers a saanda a mangipatungpal ti price increase aginggana Abril 16, 2026.
Kas paset ti panagbantay, linawas a mangisayangkat ti DTI ti monitoring kadagiti merkado.
Manamnama met a makitaripnong manen ni DTI Secretary Cristina Aldeguer-Roque kadagiti producers ken manufacturers tapno masigurado a saan a ngumato ti presio dagiti tagilako iti laksid ti agtultuloy a panagngato ti presio ti langis gapu iti rinnupak idiay Middle East.
Inaklon ni Castro a nupay adda dagiti puersa iti sangalubongan a merkado a saan a mapasardeng ti gobierno, aramiden dagiti amin nga ahensia ti amin a kabaelanda tapno saan nga agbalin a nadagsen a baklayen dagiti umili.###
