Nainget a pinaglibakan ti Malacañang dagiti report iti social media mainaig iti mapapati nga insidente ti road harassment a nakairamanan ti “presidential son” iti paset ti North Luzon Expressway (NLEX).
Segun kenni Presidential Communications Office (PCO) Secretary Dave Gomez, awan ti napasamak nga insidente a nakairamanan ti asinoman kadagiti annak ti Presidente.
“There is no such incident involving any presidential son,” mensahe ni Sec. Gomez.
Adda dagiti rumrumuar a report iti social media a pasado alas-siete ti rabii ket maipagarup nga hinarang dagiti tallo a lugan iti convoy a nagluganan ti maipagarup nga anak ti presidente.
Adda met dagiti report a 15 a lallaki ti bimmaba manipud kadagiti lugan, nga iti maysa ket nakarehistro iti maysa nga ili idiay Bulacan, ken kinomprontada iti convoy kalpasan a nag-overtake daytoy.
Nupay kasta, awan pay ti naipaulog nga opisial a palawag dagiti otoridad.###
