BR LA UNION – Direkta nga inawagan ti Malakanyang a managim-bubukod ni Vice President Sara Duterte kalpasan nga imbaga na a saanna a kayaten a tulungan ni President Ferdinand Marcos Jr., iti tarigagay na a mailako ti bagas iti P20 kada kilo.
Imbaga ngamin ni VP Sara nga adda ammo na a wagas tapno mailako ti P20 kada kilo iti bagas ngem saanna a kayat nga ibinglay daytoy.
Kas sungbat ti nasao a waragawag, imbaga ni Palace Press Officer ken PCO USec Claire Castro nga arigna ubing ti ipak-pakita a kababalin ni vice president duterte.
Segun kenni Castro, saan a maysa a playground iti gobyerno para kadagiti inu-ubing nga aramid a kas iti bise presidente.
Impaganetget ni Castro, iti nasao nga aksiyon ti bise presidente, rum-rumwaren ti pudno a klase ken burik na kas public servant, a maysa a managimbubukod.
Impaganetget pay ni Castro a ti pagimbagan dagiti umili ti rumbeng nga agpannuray nangruna ket adu kunana iti pilipino a marigatan a gumatang ti taraon nga uray pay iti nalaka a bagas.
Nasken kunana a panunuten ti bise presidente a ti panagserbi iti ili ket saan nga ay-ayam isunga saan koma a mangipakita ti inu-ubing nga aramid.
Kinuna na pay a ti panagtulong kadagiti nakurapay a pilipino babaen iti serbisyo kas ti panagilako ti nalaka a bagas ket saanen a kasapolan nga i-tayming, ngem ketdi nu anya iti ammo a wagas tapno makatulong ket isuti dagus nga ipakat.
