Inadmitir ti Malacañang a madanagan da ti kaadda ti monster ship ti China iti uneg ti exclusive economic zone ti Pilipinas.
Gapu iti daytoy, segun kenni Executive Secretary Lucas Bersamin, saan nga agsardeng ti Philippine Coast Guard a mang-challenge iti kaadda ti Chinese coast guard iti teritorio ti pagilian.
Kinuna ni Bersamin a ti kaadda ti monster ship ti China iti uneg ti teritorio ti pagilian ket nairanta a mangbutbuteng kadagiti mangngalap a Pilipino.
Innayon ni Bersamin a dua nga aksyon ti ipatpatungpal ti gobierno ditoy:
Umuna, itultuloy ti mangipila iti diplomatic protest kontra China; Ti maikadua a wagas ket ti vice-ministerial conference a pagsinsinnublatan nga iho-host ti Pilipinas ken Beijing.
Iti nadakamat a komperensia ket mapagsasaritaan ti pannakarisut dagiti isyu iti West Philippine Sea a pakaigapuan ti saan a panagkikinnaawatan iti nagbaetan dagiti pagilian.
Karaman kadagitoy nga isyu ti pannakibiang ti China iti EEZ ti pagilian, maritime domain issues ken harassments kadagiti mangngalap ken PCG personnel.
Kinunana a no adda nadagdagsen ngem daytoy ket maipangato ti kaso iti global wenno international issue.
Nasaripatpatan ti monster ship idi Sabado iti asideg idiay Capones Island, Zambales ket ita ket addan sadiay Occidental Mindoro asideg ti Lubang Island.
Umuna iti amin, inwaragawag ti National Security Council a saan nga agsardeng ti PCG ship BRP Cabra iti shadowing wenno mangsurot iti monster ship ti China.
