Awan ti pagkasapulan nga i-mobilize ti military intelligence group tapno tamingen dagiti nailista a kidnapping incidents ditoy Pilipinas.
Daitoy ket kasaruno ti panangparegta ti mamanday-linteg iti Malakanyang nga usarenen ti intelligence group para iti kidnapping incidents gapo paylaeng iti pammapatay iti negosyante a ni Anson Que ken ti driver na a ni Armani Pabillo.
Segun kenni Palace Press Officer Claire Castro, awan pay ti natibker a basaran tapno maibaga nga adda iti “kidnapping spree” wenno nagrairan ti kaso ti panagkidnap ditoy pagilian tapno maaramaten iti military intelligence.
Impaganetget ni Castro iti waragawag ni PNP Chief Gen. Rommel Marbil nga isolated ken kalkulado nga aksyon ti inaramid dagiti suspek a karaman ti kaso ni Anson Que kasta met a kwarta ken personal a panangibales ti motibo iti krimen.
Agtalek iti Palasyo a kontrolado ti pulisya iti sitwasyon ken agbalin dagiti estratehiya ti law enforcement agencies.
Maipaima itan iti PNP iti panagdesisyon nu agkasapulan pay ti kanayunan a pwersa babaen ti military intelligence kas responde kadagiti kaso ti kidnappings.
Daitoy ti pakabulan a sungbat ti Palasyo ti kinunan ni Surigao del Sur Rep. Johnny Pimentel a nasken nga usarenen ni Presidente Ferdinand Marcos Jr. ti bileg na a pagarawen ti militar ken tulongan ti kapulisan a labanan ti pangta iti nadakamat a kaso.
