Panggep itan dagiti maseknan nga ahensya ti gobierno, kabinnulig dagiti akademiya ken international partners ti pannakaipasdek ti National Forensics Institute.
Daitoy ti inbinglay ni Executive Secretary Lucas Bersamin iti handover ceremony ti baro a forensic equipment a donasyon ti Japan ditoy Pilipinas.
Kinuna ni Bersamin a nagpirman ti Department of Justice, University of the Philippines Manila, ken United Nations Office on Drugs and Crime (UNODC) iti Declaration of Cooperation to Strengthen Procedures to Investigate Custodial Deaths of Persons Deprived of Liberty (PDL).
Babaen daitoy, dagiti bangkay dagiti PDLs manipud kadagiti pasilidad ti Bureau of Corrections idiay Metro Manila ket maiyakar idiay University of the Philippines-Manila para iti independent autopsy ken forensic examination.
Impaganetget ti opisyal a daitoy ket maysa a moral commitment iti panangitandudo ti madagdagos a panangipadamag ti independent investigation kadagiti pannakatay iti uneg ti pagbaludan.
Agtalek ni Japanese Ambassador to the Philippines Kazuya Endo a ti kaunaan a donasyon manipud Japan ket makatulong iti gobierno ti Pilipinas a mangpapigsa iti forensic capabilities dagiti law enforcement agencies kasta met dagiti judicial authorities.
