Madaman a maisaysayangkat ti Mandatory Training para kadagiti baro a nabutosan nga opisial ti Sangguniang Kabataan idiay ili ti Agoo.
Maiyannurot daytoy iti RA No. 10742 wenno Sangguniang Kabataan Reform Act of 2015 kas naamendaran ti RA 11768, nakailanad iti linteg a nasken a maipasidong nga dagiti baro nga opisial ti SK iti mandatory training sakbay nga agtakem dagitoy.
Maibinglay kadagiti agtutubo nga opisial ti pannakaammo maipapan iti desentralisasion ken lokal a panagturay, pakasaritaan ken napateg a tampok ti SK, panagsurat kadagiti notes ken minutes of meetings ken pagaramid ti resolusion, panagplano ken panagbadyet, ken ti Code of Ethical Standards.
Nabingay ti 4 nga aldaw iti training a nangrugi idi kalman, para iti uppat a batch manipud iti 49 a barangay ti Agoo.
Nagserbi kas Induction Officer ni Mayor Frank kadagiti baro nga opisyal ti SK ket impaganetget na kadagitoy ti panangipatungpal dagiti naipanawen a programa ken proyekto para kadagiti agtutubo iti masakopan da a barangay.
