LA UNION – Natalged a nakaawid iti pamilya na iti maysa a 23-anyos a mangngalap nga immunan a naipadamag a mapukpukaw kalpasan a napan nagkalap iti kabaybayan idi Hulyo 25 agdama a tawen.
Nabigbig daytoy a ni Jon Jon Carlos Medriano, residente ti Fishermen’s Village, Brgy. Poro, City of San Fernando, La Union.
Base iti impormasyon a naipatulod iti Fb page ti Bombo Radyo La Union, naisar-ong ni Jon Jon idiay Brgy. Paraoir, Balaoan, La Union ken inaywanan dagiti nakakita a residente sadiay.
Iti kaudian nga impormasyon, innala daytoyen iti COAST GUARD ken dagus a naipakaammo iti pamilya na ti pannakasarak da daytoy.
Partikular a nasarakan isuna ni Mr. Ferdinand Sibayan Tadije agarop alas 6:30 iti kabaybayan idiay Barangay Paraoir.
Maipalagip nga idi Hulyo 25, aldaw ti Domingo, ket nadawel pay laeng iti kabaybayan, a gapwanan iti agraraira a habagat a pinapigsa ti napalabas a bagyo Fabian.
