BR LA UNION – Tiniliw dagiti otoridad idiay Bauang, La Union ti maysa a mangngalap gapu iti panagkalap na iti kabaybayan a saanna a masakopan, wenno panaglabsing iti non-compliance of color coding.
Ti suspek ket agtawen ti 51, addaan asawa, residente ti Barangay Poro, San Fernando City, La Union.
Maibasar iti report, ti bangka ti suspek ket naka-rehistro laeng ditoy siyudad, ngem naduktalan a napan nagkalap iti kabaybayan a sakop ti Barangay Baccuit Norte, Bauang, La Union.
Napasamak ti insidente idi aldaw kalman, Agosto 17, 2025.
Naamwan a kadwa ti suspek iti maysa a menor de edad a lalaki.
Nakumpiskar manipud iti posesyon ti suspek ti uppat a planggana ti aramang.
Nai-record ti pasamak babaen ti body-worn camera ken alternative recording device dagiti otoridad.
Naiturong dagiti dua idiay Caba District Hospital, Caba La Union para iti medical examination.
Kalpasan a naiyisyuan ti citation ticket ti nasao a mangngalap ket pinalubosan met laeng ti Bauang Police Station.
