LA UNION – Naiyanunsiyo a dead-on-arrival idiay Balaoan District Hospital iti maysa a mannalon a nadungpar ti bus, bayat a magmagna iti igid ti national highway idiay Barangay San Blas, Bangar, La Union.
Iti biktima ket nabigbig a ni Eduardo Ulpindo, addaan asawa, residente ti Barangay Agdeppa ti nasao met laeng nga ili.
Nabigbig met iti respondent driver ti airconditioned bus a ni Ferdinand Marcos Ramos, 44, addaan asawa, residente ti Banna, Ilocos Norte.
Base iti nakalap nga impormasyon ti Bombo Radyo, magmagna ti biktima iti igid ti kalsada idi maipagarop a nadungpar daytoy ti bus nga agpa- Manila.
Dagus a naiturong ti biktima iti kaasetgan a pagagasan ngem saanen a dimmanon a sibibiag.
Kabayatanna, dagus met a simmuko ken adda ita iti custodiya ti Bangar Police Station iti respondent driver para iti umno a disposisyon.
