LA UNION – Maysa a mannalon iti natagbat ti ulo ken takyag na kalpasan a dinarup ti pada na met laeng a mannalon idiay Sitio Turod, Barangay Rizal, Tubao, La Union.
Iti biktima ket managan Jeffrey Nalupa, 38-anyos, bayat a ti suspek ket nabigbig a ni Jay-R Difuntorum, 29-anyos, agpada a residente iti nadakamat a barangay.
Base iti police report, iti biktima kadwa dagiti gagayyem na ket agi-inom idi kellaat a simmangpet iti suspek kasaruno iti maipagarop a panang-tagbat na iti biktima ti namindua a daras, babaen iti imet daytoy a buneng.
Naiturong ti biktima iti Ilocos Training and Regional Medical Center (ITRMC) ket naipasidong iti operasyon.
Nakalasat ti biktima iti laksid a natagbat ti ulo daytoy ken agtultuloy a matamtaming ken agpapaimbag iti pagagasan.
Kabayatanna, iti suspek agraman ti inusar na a buneng nga agatiddog ti 6.5 inches manipud putan agingga murdong, ket naipasidong iti custodiya ti Tubao Police Station.
Segun kadagiti imbestigador, sigud a susik iti motibo ti insidente.
Iti kauddian nga impormasyon, desidido iti biktima a mangidatag ti kaso kontra iti suspek.
