Naiyakaren ni Mary Jane Veloso iti regular dorm ti Reception and Diagnostic Center (RDC), Correctional Institution for Women (CIW) kalpasan ti 5-day quarantine period.
Segun iti Bureau of Corrections (BuCor), 55 nga aldaw ti panagtalinaed ni Veloso sadiay.
Maibasar ken ni Correctional Institution for Women acting superintendent Marjorie Ann Sanidad, kadua ni Veloso ti 30 a baro a persons deprived of liberty (PDLs).
Maipasidong ni Veloso ti mandatory orientation, diagnostics ken classification.
Kabayatanna, imbilin ni BuCor Director General Gregorio Catapang ti pannaka-translate dagiti rekord ni Veloso manipud Indonesia.
Kinunana a napateg daytoy a translation para iti ahensia gapu ta daytoy ti mangipalubos kadakuada a mangtingiting no opisial a mabigbig ti nasurok a 14 a tawen a pannakaibalud ni Veloso idiay Indonesia kas balido a panawen ti pagbaludan iti sidong ti masakopanda.
Maipalagip a nagapela ni Veloso ken ti pamiliana babaen ti panangkolektada iti signature campaign tapno awagan ni Presidente Ferdinand Marcos Junior a mangted iti executive clemency para kenni Mary Jane.
Ngem iti biang ti Presidente, immun-una a kinunana nga intaleknan ti desision maipapan iti posible a clemency kenni Veloso kadagiti legal experts ti gobierno.
Kabayatanna iti dasig ti Indonesia a nakaibaludan ni Veloso iti nasurok a sangapulo a tawen, kunada a respetuendan ti aniaman a desision ti Pilipinas agraman ti panangipaayda iti clemency kenni Veloso.
