LA UNION – Posible a maiyawid ditoy Pilipinas iti Pinay nga adda iti death row idiay Indonesia a ni Mary Jane Veloso inton paskua, segun iti Department of Foreign Affairs (DFA).
Segun kenni DFA USec. Eduardo de Vega, saan pay a naisapinal iti panagsasarita iti pannakaiyakar ni Veloso ditoy Pilipinas ngem manamnama a maiturpos daytoy inton paskua a naballaygi ken awan pannakaitantan na.
Kinuna pay ti opisyal a sumagmamano itan a bulan ti napalabas ket nag-reach out ti Pilipinas iti Indonesia seknan iti kaso ni Veloso kas baro a rugi ti relasyon ti dua a pagilian, iti sidong ti baro a Presidente ti Indonesia a ni President Prabowo Subianto.
Immunan nga inyanunsiyo ni President Ferdinand Marcos Jr. ita nga aldaw a naaddaan ti katulagan iti Indonesian authorities tapno maiyawid ditoy pagilian ni Veloso.
