Agtaltalinaed latta ditoy Pilipinas ti mastermind iti panagkidnap ken pammapatay Koreano a negosyante a ni Jee Ick-joo.
Segun kenni Bureau of Immigration (BI) spokesperson Dana Sandoval, adda latta ditoy pagilian ni sigud a Police Superintendent Rafael Dumlao III ken maudi daitoy a nagbiahe idi pay napalabas a tawen 2024.
Agdama met ti nakapaulog a hold departure order (HDO) ken immigration lookout bulletin order (ILBO) kontra kenni Dumlao.
Nupay saan a pawpawilan ti ILBO ti maysa nga indibidwal nga agbiahe iti ruar ti pagilian, babaen met ti impaulog ti korte a HDO, mabalin a malapdan ti suspek wenno indibidwal nga agbiahe nu sumangsango daitoy kadagiti criminal charges.
Imbatad ni Sandoval a dagos da nga ipadanon kadagiti otoridad apaman adda iti impormasyon dan kenni Dumlao ti sadinoman a sangladan a banbantayan ti Immigration.
