Nakasaganan ni Pasig City Mayor Vico Sotto nga idauloan ti nainget nga imbestigasyon a nakapamaysa kadagiti palpak a flood control projects iti masakopan na.
Daitoy ket kasaruno metten ti panangiyuswat ni Presidente Ferdinand Marcos Junior ti inisyatiba a ‘sumbongsapangulo.ph’ website, maysa a plataporma a pakakitaan dagiti detalyado a listaan ti nagduduma a proyekto ti Department of Public Works and Highways (DPWH).
Karaman kadagiti detalye ket ti mismo a nagan wenno titulo ti proyekto, pakabuklan a gatad na, completion date, ken ti lokasyon a nakaipasdekan na.
Nupay kasta ket inlawlawag na met a kasapulan na pay a makita ken maadal nu adda pay ti sabali a napateg a dokumento tapno maawatan a nalaing ti kasasaad ti tunggal proyekto, partikular ti ‘Program of Works’ ken ‘Bill of Quantities’ dagitoy.
Innayon met ti ni Mayor Vico a mangipatulod ti ciudad ti Pasig ti maysa a pormal a mensahe ti DPWH ita metlaeng a lawas tapno kiddawen ti access kadagiti impormasyon babaen ti Freedom of Information (FOI) law.
Agtalek isuna a ti panangaramat ti nasao a paglintegan ket makatulong para iti transparency ken accountability ti panangipatungpal kadagiti proyekto.
