Bulgar nga inaklon ni Presidente Ferdinand Marcos Junior a dismayado dagiti kailian a Pilipino ti nabuntog unay a serbisyo ti gobierno nga arig na saan da a marikrikna.
Ti waragawag ti Presidente ket imbasar na ti naadal na iti naglabas nga eleksyon. Inbinglay na a malaksid ti nabuntog unay a serbisyo ti gobierno ket naum-uma payen dagiti Pilipino ti kinangiwat ti politika ditoy Pilipinas.
Innayon met ni Presidente Marcos nga uray isuna ket mabunbuntogan kadagiti proyekto, nangruna iti transportasyon, isu ket tarigagay na ita a maileppas dagiti addaan iti long term effects para ti publiko.
Karaman kadagiti ipamaysa ti administrasyon ket ti dadakkel a proyekto nga nairanta para iti turismo, salun-at, ken transportasyon. Tarigagay ti Presidente ti naginhawa a panagbiahe dagiti umili.
Ita a nalpasen ti midterm elections, kiniddaw na a maisardengen ti panangidatag kadagiti akusasyon dagiti nagduduma a dasig ken kinunana a panawenen tapno agtrabaho ti kaaduan para ti panagrang-ay ti pagilian.
