BR LA UNION – Natay iti maysa a lalaki kalpasan a binagsol ti suspek iti namin-adu a daras, agarop alas 11:25 ti rabii idi Mayo 22, 2025 asideg iti rangtay idiay Barangay Tallipugo, Balaoan, La Union .
Nabigbig iti biktima nga agtawen ti 44, addaan asawa, residente ti Brgy. Calliat, Balaoan La Union.
Nabigbig met ti suspek nga agtawen ti 42, addaan asawa,janitor ken residente ti Brgy. Sipangan Sur, Balaoan La Union.
Maibasar iti inisyal nga imbestigasyon ti Balaoan Police Station, nakalugan ti suspek iti motorsiklo na ngem nakasardeng iti asideg ti rangtay bayat a ti biktima ket agawid koman idi nagrana dagitoy iti nasao a lugar.
Agpar-parang a naaddaan ti argumento dagiti dua sakbay ti pammagsol, ngem saan a nalawag iti report nu agam-ammo dagitoy ken anya ti rason ti posible a nagsinnubangan iti suspek ken biktima.
Kabayatanna, maysa a saan a nainaganan a witness iti nangibaga kadagiti otoridad, a nakita na iti suspek a nangala ti maysa a banag iti compartment ti motorsiklo na, a maipagarop a nausar iti pammagsol iti biktima.
Iti nasao a witness ti nagreport iti pulisiya ken kimmiddaw ti tulong para iti pannakaiturong ti biktima iti pagagasan.
Ngem naideklara a dead-on-arrival ti biktima iti Balaoan District Hospital idiay Balaoan, La Union babaen kenni Dr. Claire Maramat Lucena.
Kabayatanna, dagus met a natiliw ti suspek babaen iti tulong wenno statement ti testigo.
Sumangsango ita ti suspek iti kaso a homicide.
