Narekobren dagiti otoridad ti maysa kadagiti dua a flight data recorder wenno blackbox ti nagsuwek nga Air India passenger plane.
Segun kenni civil aviation minister, nakita iti blackbox iti crash site sadiay Ahmedabad ken agtultuloy met a mabirbirok ti maysa pay a blackbox iti nasao a lugar.
Personal met a bimmisita ni Indian Prime Minister Narendra Modi iti lugar a nagsuwekan ti eroplano. Kabayatanna, nirugianen dagiti imbestigador manipud United Kingdom ken Estados Unidos ti panagadal da tapno maamoan ti nagbalin a rason ti aksidente.
Nangisayangkat met ti panagtugkel ti kandila dagiti residente asideg iti lugar kas pannakisimpatya kadagiti biktima.
Dumanon ti walo a tattao ti pimmusay iti lugar a nagsuwekan ti eroplano bayat a naited metten kadagiti pamilya ti biktima dagiti innem pay a bangkay kalpasan a binigbig daitoy dagiti kakabagian da.
Maipalagip a kellaat lattan a nagsuwek ti Air India, sumagmamano a minutos kalpasan ti takeoff nga agturong sadiay London. Kadagiti 242 a sakay ti eroplano ket maysa laeng ti milagro a nakalasat – maysa a Briton a ni Vishwashkumar Ramesh.
