BR LA UNION – Kinemmeg dagiti otoridad idiay Sto Tomas, La Union ti maysa nga ama gapu iti maipagarop a panangpatay ti bukod na nga anak babaen ti bagsol.
Napasamak ti insidente iti mismo a pagtaengan dagitoy idiay Barangay Ambitacay, Sto. Tomas idi rabii ti Martes, Marso 18, 2025.
Iti suspek, segun kenni Police Provincial Director, PCol. Heryl K. Bruno, ket maysa a 68-anyos a mannalon bayat a ti biktima nga anak na ket 19-anyos.
Maibasar iti inisyal nga imbestigasyon ti Sto Tomas Police Station, saan a panagkinnaawatan wenno timpuar a nabara nga argumento iti baetan ti ag-ama ti nakaigapwan ti napasamak a pammagsol.
Sakbay ti insidente, maipagarop a nagapa nga immuna ti biktima ken live-in na.
Ginandat ti suspek a bumallaet wenno pagtalnaen ti panagsinnungbat dagiti dua, ngem maipagarop nga insaruno laeng ti biktima a kina-riri ti ama na.
Gaputi dayta, maipagarop a binagsol ti suspek ti biktima iti barukong. Dagus a naiturong idiay La Union Medical Center idiay Agoo, La Union ngem naideklara a dead-on-arrival babaen ti attending physician.
Iti suspek ket adda itan iti custodiya ti Sto Tomas Police Station ken sumangsango iti kaso a parricide.
