Nangisayangkat ti naggidan nga implementasyon ti search warrant dagiti nagtipon a puwersa ti Philippine Drug Enforcement Agency-Ilocos Sur Provincial Office (PDEA-ISPO), Narvacan Police Station, Ilocos Sur Police Provincial Office-Provincial Drug Enforcement Unit (ISPPO-PDEU), ISPPO Provincial Intelligence Unit – (ISPPO-PIU), ken ISPPO-1st Provincial Mobile Force Company (ISPPO-1st PMFC), a nangigubuay ti pannakaarestar ti maysa nga incumbent barangay kagawad ken ti maysa pay a drug personality.
Binigbig ni PDEA RO1 Director III Joel B Plaza dagiti suspects nga isuda Virgilio Alban Parel Junior, 55-anyos, maysa a barangay kagawad; ken ni Rogelio Jacob Mendoza, 60-anyos, agpada a residente ti Barangay Lungog, Narvacan, Ilocos Sur.
Napasamak ti search operation itay 11:10AM, Pebrero 8, 2025, sadiay pagtaengan da Parel Junior.
Nakumpiskar kenkuana ti 11 a pidaso ti heat-sealed transparent plastic sachet a naglaon ti shabu, agdagsen ti uppat a gramo nga aggatad ti P27,200.00, mainayon pay ti sumagmamano a drug paraphernalia, maysa a black leather wallet, ken coin purse.
Kabayatanna, iti pagtaengan met da Mendoza ket nakakumpiskar dagiti operatiba kadagiti pito a pidaso ti heat-sealed transparent plastic sachet a naglaon ti shabu ken agdagsen ti nasurok-kumurang dua a gramo nga aggatad ti P14,000.00, maysa a caliber .22 rifle, ken dua a pidaso ti live ammunition.
Mapilaan ni Parel Junior ti kaso a panaglabsing ti Section 11 (Possession of Dangerous Drugs), Section 12 (Possession of Drug Paraphernalia), Article II iti Republic Act 9165 wenno The Comprehensive Dangerous Drugs Act of 2002, bayat a ni Mendoza ket mapilaan met ti kanayunan a RA 10591 wenno an Act Providing for a Comprehensive Law on Firearms and Ammunition and Providing Penalties for Violations Thereof.
Iti agdama ket nakadetene ti agpada a suspek sadiay Narvacan Police Station jail facility idiay Ilocos Sur. #
