BR LA UNION – Inawagan ni sigud a Narvacan Mayor ken Ilocos Sur Governor Chavit Singson nga awan ti basaran ken pana-politika laeng ti kaso a graft and plunder a naipila kontra kenkuana.
Naipila ti kaso baban ti grupo ni Atty. Estelita Cordero idiay Office of the Ombudsman gaputa maipagarop a nag-kuwartaan na iti panagilakona iti daga ken saan nga umiso a panangusar ti pondo.
Maibasar iti reklamo, maipagarop a nakaibulsa ni Singson iti 100 million a pisos manipud iti panaglakona ti 10 nga ektarya a daga a kukua ti ili a Narvacan.
Segun kenni Singson, ti nadakamat a transaksiyon ket nagresulta iti pannaka-lugi na iti dumanon ti P680 million gaputa tinulonganna ti munisipyo.
Inlawlawagna nga isuna ti nangurnos iti transaksiyon ken pinilina a saanen nga iyakar ti titulo tapno maliklikan dagiti isyu kas iti double-selling.
Binabalaw pay ti sigud a gobernador ni Cordero gaputa isuti first-cousin ti karibalna iti politika ken inabakna pay a mayor idiay Narvacan.
Inbutaktak na pay nga adda pakasaritaan ni Cordero a nangriribuk kenkuana ken namin-adu nga inikkanna ti kuwarta para iti sumagmamano a kiddawna.
Kinunana a nalawag a maysa a panagibales iti inaramid ni Atty. Cordero gaputa saan na a napatgan ti naudi a kiddawna.