Naarestar ti nagtipon a puersa dagiti operatiba manipud Philippine Drug Enforcement Agency – Pangasinan Provincial Office ken Villasis Police Station ti maysa nga resurgent drug personality babaen ti naiyuswat a buy-bust operation idiay Villasis, Pangasinan.
Binigbig ni PDEA RO1 Regional Director, Director III Joel B. Plaza ti suspek a ni Avelino Manzano Mencias Junior, 40-anyos, maysa nga high-value target drug personality, ken residente ti nasao nga munisipalidad.
Napasamak ti operasyon agarop 8:25 ti rabii idi kalman, Enero 27, 2025 nu sadino ket narekobre dagiti otoridad ti maysa nga heat-sealed transparent plastic sachet a naglaon ti white crystalline substance a mapapati nga shabu ken agdagsen ti nasurok-kumurang lima a gramo nga aggatad ti P34K.
Malaksid iti droga ket narekobre pay ti maysa a mobile phone ken brown envelope kasta met iti buybust money.
Nakadetene itan ti suspek sadiay PDEA ROI jail facility idiay Camp Diego Silang, Carlatan, San Fernando City, La Union bayat a maisagsaganan ti maipila a kaso kontra kenkuana partikular ti panaglabsing ti Sale of Dangerous Drugs iti Article II, Section 5 ti Republic Act 9165 wenno ti Comprehensive Dangerous Dugs Act of 2002.
