LA UNION – Nagpatnag a nagbantay iti municipal disaster risk reduction and management office wenno MDRRMO-San Juan iti posible nga agbalin nga epekto ti bagyo pepito iti kabaybayan.
Iti interview ti Bombo Radyo La Union kenni MDRRMO-San Juan head Gino Mabalot, naka-red alert status ti konseho sipud idi kalman, tapno bantayan ti sitwasyon iti masakopan da, nangruna nu adda iti umili nga agkasapolan ti tulong.
Partikular a bantayan da nu adda bagyo ket iti Barangay Urbiztondo ken Barangay Taboc, San Juan.
Kinuna ni Mabalot a nakasagana a kanayon dagiti assets ti ili para iti rescue operation, a pakaibilangan iti 3 nga ambulansiya, maysa a patient transport vehicle, argaman dagiti heavy equipments.
Imbinglay pay ni Mabalot iti numero ti telepono a mabalin a tawagan dagiti umili nga agpatulong ken kayatna ti tumulong.
Manipud idi kalman, naipatungpal ti beach closed ti ili a San Juan agingga nga agsubli ti normal a kasasaad ti panawen.
