BR LA UNION – Impatungpal ti gobiyerno probinsiyal ti Catanduanes iti mandatory evacuation kadagiti lugar a maibilang a high-risk idi kalman, Domingo, Pebrero 8, kalpasan a nangigubway ti napipigsa a panagtudo iti shear line a nagresulta iti panaglayos ken panagregga-ay ti daga iti sumagmamano nga ili ti nasao a probinsiya.
Segun kenni Governor Patrick Alain Azanza, nabilin ti amin a mayor ken dagiti chairperson ti Municipal Disaster Risk Reduction and Management Council (MDRRMC) a dagus nga ipatungpal ti ingkapilitan a panagakar, nangruna kadagiti lugar a landslide-prone, nababa a komunidad, igid ti karayan, ken coastal areas a delikado nu aglayos, ag-reggaay ti daga, ken storm surge.
Kabilang dagiti kangrunaan nga apektado ket idiay ili ti San Miguel, Viga, Bato, ken Bagamanoc.
Iti maysa a memorandum, impaganetget ti gobernador a maisayangkat ti maitutop nga addang kadagiti residente nga agkedked a sumurot iti evacuation orders, kas paset ti addang tapno masiguro ti kinatalged ti publiko iti tengnga ti dakes a panawen.
Kabayatanna, kinumpirma ti pulisya iti pannakatay ti maysa a 32-anyos a lalaki kalpasan a naiyanod iti napegges a layos idiay Barangay Bigaa, Virac.
