Dead on arrival iti Balaoan District Hospital ti maysa a menor de edad kalpasan a nagdinnungpar ti dua a motorsiklo idiay Barangay Butubut Oeste, Balaoan, La Union idi malem kalman.
Nabigbig ti pimmusay a biktima a ni Kyla Fable y Flores, 4 anyos, residente ti Barangay Nalvo Norte, Luna, La Union.
Maibasar iti police report, nakaawat ti awag ti Balaoan Police Station maipapan iti napasamak a vehicular traffic incident iti kawatiwatan ti Balaoan-Santol road idiay Barangay Butubut Oeste a nakairamanan ti motoriklo a nagmaris ti nangisit ken nalabbaga a minaneho ni Joseph Flores, addan ti umno a edad, baro, construction worker, residente ti Barangay Nalvo Norte, backride na ti pimmusay a biktima ken ti motorsiklo a nagmaris ti nalabbaga a minaneho met ni Daniel Javier, 31 anyos, addaan asawa, corn technician, ken residente ti Barangay Bigbiga, Sudipen, La Union.
Agpada nga agturturong ti agpalaud a direksyon ti dua a behikulo idi napasamak ti aksidente a nakairamanan ti biktima a naideklara a dead on arrival babaen iti attending physician a ni Dra. Cecile Faye L. Perdigon.
Naamuan nga awan ti suot a helmet ti driver a ni Flores ken agpada nga adda ti impluwensya ti arak ti dua a driver idi nagdinnungpar ti dua a behikulo.
Natalinaay ti panawen idi napasamak ti panagdinnungpar ti dua a lugan idi kalman ken agpada a nagpasar ti pannakadadael dagiti behikulo.
Kabayatanna, maur-uray ti resulta ti CCTV footage iti nakapasamakan ti aksidente tapno maamuan ti puon ken gapu a nagdinnungpar ti dua a behikulo a nakatayan ti menor de edad.
